Deu 21 | NdeIBE | STEP | Nxa kungafunyanwa umuntu obuleweyo egangeni, elizweni uJehova uNkulunkulu wenu alinika lona ukuba libe ngelenu, kungaziwa ukuthi ubulewe ngubani,

Deuteronomy 21

Ukuhlawulelwa kokubulala

1 Nxa kungafunyanwa umuntu obuleweyo egangeni, elizweni uJehova uNkulunkulu wenu alinika lona ukuba libe ngelenu, kungaziwa ukuthi ubulewe ngubani,

2 abakhokheli benu kanye labehluleli bazakuya balinganise umango phakathi kwalowo obuleweyo lamadolobho aseduze. 3 Kuzakuthi abakhokheli bamadolobho aseduzane lesidumbu leso bathathe ithokazi elingakaze lisetshenziswe futhi okungakaze kugaxwe ijogwe phezu kwalo 4 balithintele esigodini esingakaze silinywe kumbe kuhlanyelwe ulutho kiso njalo kube lapho okulesifula esigelezayo. Kabephule intamo yalo khonapho esigodini leso. 5 Abaphristi, amadodana kaLevi, bazasondela, ngoba uJehova uNkulunkulu wenu ubakhethile ukuba benze inkonzo njalo bamemezele izibusiso ebizweni likaJehova behlulele amacala okuxabana lawokulwa.

6 Abakhokheli balawo madolobho aseduzane lesidumbu leso bazagezela izandla zabo phezu kwethokazi elephulelwe intamo esigodini,

7 bafakaze bathi: “Izandla zethu kazilichithanga leligazi, futhi asibonanga kusenzeka. 8 Yamukela lindlela yokubuyisana yabantu bakho abako-Israyeli, obahlengileyo, O Jehova, ungabeki icala phezu kwabantu bakho ngenxa yegazi lomuntu omsulwa.” Ngakho ukuchithwa kwegazi kuzahlawulelwa. 9 Ngalokho lizazigeza emlandwini wokuchitha igazi elingelacala, njengoba selenzile okuhle emehlweni kaJehova.

Ukuthatha umfazi othunjiweyo

10 Nxa usiya empini ukuyahlasela izitha zakho kuthi uJehova uNkulunkulu wenu anikele izitha zenu ezandleni zenu, lizithumbe,

11 ungabona owesifazana omuhle njalo akukhange, ungamthatha abe ngumfazi wakho.

12 Uzamusa emzini wakho, aphuce ikhanda lakhe, aqume inzipho zakhe njalo 13 akhumule izigqoko athunjwe ezigqokile. Kuzakuthi lapho eseqede inyanga eyodwa esemzini wakho elilela uyise lonina, usungamthatha abe ngumkakho,

14 kodwa uma engakuthokozisi, umkhulule aye lapho athanda khona. Ungamthengisi kumbe umphathe njengesigqili, ngoba usumhlazisile.

Ilungelo leZibulo

15 Uma indoda ilabafazi ababili, ithande omunye kodwa omunye ingamthandi, kuthi bobabili bayizalele amadodana kodwa izibulo libe yindodana yomfazi engamthandiyo, 16 uba ehlela ukwabela amadodana akhe impahla yakhe, akumelanga emuke izibulo lakhe ilungelo lalo aliphe indodana yomfazi amthandayo esikhundleni sezibulo langempela, indodana yomfazi engamthandiyo. 17 Kufanele itshengisele ukuthi indodana yomfazi ongathandwayo yilo izibulo ngokuyinika isabelo esiphindwe kabili sempahla yayo yonke. Leyo ndodana iyisitshengiselo sakuqala samandla kayise. Ilungelo lobuzibulo ngelayo.

Indodana engumhlamuki

18 Uma indoda ilendodana eyisiqholo njalo engumhlamuki engalaleli uyise lonina nxa beyikhuza, 19 uyise lonina bazayibamba bayise kubakhokheli esangweni ledolobho lakibo.

20 Bazakuthi kubakhokheli, “Indodana yethu le iyisiqholo njalo ingumhlamuki. Ayisilaleli. Iyisixhwali njalo iyisidakwa.” 21 Ngakho wonke amadoda akulelodolobho azayitshaya ngamatshe ize ife. Lifanele liqede bonke ububi phakathi kwenu. U-Israyeli wonke uzakuzwa lokhu esabe.

Imithetho eyahlukeneyo

22 Nxa umuntu olecala elikhulu ebulawa kuthi isidumbu silengiswe esihlahleni,

23 lingaboyekela isidumbu sakhe silenga esihlahleni ubusuku bonke. Kangcwatshwe mhlalokho, ngoba umuntu ophanyekiweyo esihlahleni uqalekisiwe nguNkulunkulu. Lingangcolisi ilizwe uJehova uNkulunkulu wenu alinike lona njengelifa.